Odd Nordstoga

Odd Nordstoga er fødd 10. desember 1972 og vaks opp på garden Plassen i Vinje som yngst av fire sysken. I ungdomen var han aktiv del av det vitale folkemusikkmiljøet i Telemark. Som artist har Odd Nordstoga funne sin plass i krysset mellom populærmusikken og den norske tradisjonsmusikken. Han debuterte som plateartist med bandet Something Odd i 1997, for så i nokre år å drive meir med folkemusikken gjennom gruppa Blåmann Blåmann og i samarbeid med Øyonn Groven Myhren med prosjektet ”Nivelkinn” som hausta spelemannspris for beste folkemusikkplate.

I 2004 slo han stort igjennom med plata Luring som ved hjelp av slageren «Kveldsong for deg og meg» (Tekst: Ragnar Hovland) selde heile 160 000 eksemplar. Etter dette kom plata Heim te mor med låtar som ”Dagane” og ”Frøken Franzen” omtrent på same tid som serien ”Jul i Svingen” gjekk på NRK. Der hadde Nordstoga musikken saman med John Vinge. Same året spelte han også rolla som Fuglefanten i folkemusikkversjonen av ”Tryllefløyten” som turnerte heile Noreg og Sverige.

I 2008 gav han ut eit album bygd på tekstar av Stein Versto og Ragnar Hovland som fekk namnet ”Pilegrim”. Ein ny stor kommersiell suksess kom året etter, då han i lag med Sissel Kyrkjebø gav ut juleplata ”Strålande Jul” med ikkje mindre enn 350 000 selde eksemplar og 11 ganger platina trofè. Elias Blix-salma ”Upp gledjest alle” derfrå er i dag med Nordstogas melodi teke opp i den nye salmeboka. Plata ”November” kom året etter, med låtar som ”November” og ”No er tivoliet over” som dei mest kjende.

I 2011 kom ”Bestevenn”, som i sitt heile er inspirert av Maria Parrs bok ”Vaffelhjarte” og tv-serien med same namn, der Odd også laga score-musikken. Songane ”Bestevenn” og ”Ein farfar i livet” herfrå står vel i dag som noko av det som har sett djupast merke frå Nordstogas hand. ”Bestevenn” vart feira med to utselde hus i Operaen i Oslo og ein TV-konsert på NRK. Men noko Noregsturné vart det ikkje sett av plass til. Det var derimot planen heilt frå starten av på neste prosjekt. Igjen eit samarbeid med ein av Noregs store kvinnelege songfuglar, Ingebjørg Harman Bratland. Saman tok dei utgangspunkt i sin felles folkemusikalske oppvekst og laga plata ”Heimafrå” for så å reise på turne i små grendehus, ungdomshus og liknande rundt i heile landet. 132 konsertar på tre kvart år blei det, og det heile avslutta med to utselde konsertar i Den Norske Opera.